KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang-patay sa isa ka lalaki nga pasahero sang isa ka tricycle sa Purok Rizal, Barangay Concepcion, alas-9:15 kagab-i, Agosto 24, 2025.
Ini ang nangin pahayag ni Police Captain. Ralph Marvin Francis Rivera ang spokesperson sang Koronadal City PNP sa interview sang Bombo Radyo Koronadal.
Ginkilala ang napatay nga si Regie Labrador, yara sa legal nga edad kag residente sang Maasim, Saranggani province kag temporaryo nga naga-arkila lamang sang boarding house diri sa siyudad sang Koronadal.
Suno sa utod sini, pila ka bulan na sila nga temporaryo nga nagaistar sa Koronadal bangud nagatrabaho ini sa isa ka car wash shop diri sa Koronadal.
Sa karon yara ang patay nga lawas sang biktima sa Subere Funeral Homes diri sa siyudad.
Nahibaluan nga nakaangkon sang madamo nga igo sang bala sa nagkalain-lain nga bahin sang iya lawas ang biktima.
naguwa sa inisyal nga imbestigasyon nga bag-o lamang nagpanaog ang biktima sa ginsakyan nga traysikol sang ginpalapitan sang isa ka suspetsado kag ginluthang sang makapila ka beses.
Sa karon ginahibalo pa sang mga otoridad ang motibo sang krimen.
