KORONADAL CITY – Yara na sa kustodiya sang mga otoridad ang duha ka mga indibidwal nga naaresto matapos nga gin-flagged down ang ginasakyan nga ten-wheeler wing van truck kag madakpan sa ginpatigayon nga checkpoint sa Barangay Panay, St. Nino, South Cotabato pasado alas-4 kahapon sang hapon, Oktubre 6, 2024.
Ginkilala ang mga naaresto nga sanday alyas “Rolly,” 39anyos driver sang wing van kag ang helper sini nga si alyas “Nico,” 25, lunsay mga residente sang Lebak, Sultan Kudarat.
Sandig sa impormasyon nagikan sa South Cotabato Police Provincial Office, ang mga personnel sang 2nd South Cotabato Provincial Mobile Force Company (SCPMFC) kaupod ang nagkalain-lain nga law enforcement units ang nagpatigayon sang operasyon kun diin na-flagged down ang truck kag natukiban ang 75 ka karton sang smuggled Cannon cigarettes nga nagakantidad sang Php 1.2 million.
Gilayon nga gin-aresto ang mga suspek matapos nga mapaslawan nga magpresentar sang mga dokumento sa karga nga mga sigarilyo.
Sa karon, na-turn-over na sa Bureau of Customs ang mga nakumpiskar nga smuggled cigarettes para sa nagakaigo nga disposition.
Samtang, pasakaan naman sang nagakaigo nga kaso sa Provincial Prosecutor’s Office diri sa siyudad sang Koronadal City ang mga suspek.
