Naglab-ot suno pa sa masobra 100 na ang na-injured nga mga myembro sang Kingdom of Jesus Christ sa ikaapat nga adlaw nga operasyon sang kapulisan sa compound sang KOJC agud nga e-serbe ang warrant of arrest batuk kay Pastor Apolo Quiboloy kag sa mga kaupdanan sini nga akusado sa nagkalain-lain nga kaso.
Ini ang ginkumpirmar ni Ka Eric Celiz, SMNI host kag secretary general sang Sambayanan sa interview sang Bombo Radyo Koronadal.
Suno kay Ka Eric, ang mga nagkalasamaran ang lunsay biktima sang pagpangsapote, pagpangkastigo kag pagyudyod sa semento sang kapulisan.
Wala pa nalakip diri ang una nga 24 nga injured sa una nga adlaw sang pagsulod sang kapulisan sa compound kun diin may duha nga napatay bangud sa cardiac arrest kag panic atatcked.
Gani, dako ang pagpati ni Celiz, nga indi na husto ang ginahimo sang kapulisan bangud isa na suno pa ini ka sahi sang terorismo nga gina-abuso ang mga sibilyan, kabataan, kababaihan kag mga relihiyoso sa sulod mismo sang isa ka pribado kag religious compound.
Magluwas sini, gintawag pa ni Celiz nga isa ka dako nga kabuangan ang ginhimo sang kapulisan nga operasyon nga bitbit lamang ang warrant of arrest nga makapila ka beses naman nga naserbe..// Suno pa kay Ka Eric, ang tikang nga ginhimo sang kapulisan nagapakita lamang nga m’May sense of impunity ang mga ini bangud wala sila mahadlok nga makasuhan kag manabat sa ila ginhimo bangud sa mandu nagikan sa panguluhan.
Dako man ang pagpati ni Ka Eric nga nahibaluan kag ang kamanduan nagikan mismo kay Pangulong Ferdinand Marcos Jr bangud apisar sang kinagamo nga nagakatabo na wala ini sang may ginpaguwa nga statement ukon pagpauntat man lang.
Kaangot sini, klaro suno pa nga isa ka act of terrorism ang natabo nga ginagamit lamang ang mga kaso ni pastor Quiboloy agud nga puntiryahon ang mga Duterte sa siyudad sang Davao.
