KORONADAL CITY – Pilason ang duha ka indibidwal sa pagbungguanay sang pick-up kag tricycle sa Purok 8, Brgy. Sulit, Polomolok, South Cotabato alas 7:35 kaian sang aga.
Ginkilala ang driver sang tricycle nfa si Anthony Penicilla Sr., 51 anyos, sakay ang 1 ka pasahero nga lunsay mga residente sang Brgy. Bentong sa nasambit nga banwa.
Samtang, ginamaneho naman ni Giovanni Rosete, 39 anyos nga taga-Koronadal City ang Toyota Hilux pick up.
Suno kay PLt. Col. Peter Pinalgan, acting chief of police sang Polomolok MPS, naguwa sa ila imbestigasyon nga magasulod kuntani sa crossing Brgy. Sulit ang tricycle sang nabungguan ini sang pick-up gikan sa direksyon sang Tupi, South Cotabato padulong sa banwa sang Polomolok.
Bangud sa kabaskog sang impact, napilasan ang driver kag pasahero sang tricycle nga gilayon gindala sa pinakamalapit nga hospital.
Sa karon, yara na sa kustodiya sang kapulisan ang driver sang salakyan nga si Rosete.
Padayon naman ang pahanumdom sang kapulisan sa mga nagamaneho nga maghalong agud makalikaw sa disgrasya sa dalanon.
