KORONADAL CITY – Pilason ang isa ka personal samtang naglab-ot sa masobra 100 ka mga panimalay halin sa lima ka mga barangay sa banwa sang President Quirino sa probinsiya sang Sultan Kudarat ang gindalasa sang mabaskog nga hangin dala man sang pagbuhos sang mabaskog nga ulan.
Ini ang ginkumpirmar ni Mr. Jonathan Seballos, Municipal Disaster Risk Reduction and Management Officer ukon MDRRMO sang President Quirino sa interview sang Bombo Radyo Koronadal.
Suno kay Seballos, ang mga apektado nga barangay ang ginalakipan sang Barangay Poblacion kun diin napagkit ang isa ka pilason, samtang yara naman sa 93 ka mga households ang naguba kun diin 13 diri ang totally damaged; Apektado man ang isa ka poultry sa Barangay Poblacion kag ang Immaculate Hospital matapos nga magkalabuka ang glass wall sini.
Ang iban pa nga barangay ang ginalakipan sang Barangay Bayawa kun diin may duha ka panimalay ang partially damage; Barangay Suben kun diin may mga pananum kag mga kahoy nga nagkalatumba; Barangay Malingon nga may 19 ka partially damage nga puluy-an kag nagkalatumba man ang mga puno sang kahoy kun diin nangin mabudlay ang pag-agi sang mga salakyan.
Dugang pa sa barangay nga apektado amo ang Barangay Pedtubol nga may 20 ka panimalay nga partially damage kag isa Madrasa nga naguba partikular ang canteen sini.
Magluwas sini, napagkit na nag mga nagkalahapay kag nagkalaapektuhan nga mga pananum sang mga mangunguma.
Sa karon, nagapadayon ang damage asssessment sa lugar sa kabug-usan nga damyos ukon kahalitan nga ginbilin sang pagpanalasa sang mabaskog nga hangin.
Nahibaluan nga pila ka mga salakyan man ang naguba lakip na ang salakyan ni Municipal Administrator Florante Tongo matapos matumbahan sang puno sang kahoy.
Sa karon, nangin passable na ang mga dalan nga naapektuhan sang pagkalatumba sang kahoy bangud nagpatigayon na sang clearing operation ang Municipal Engineering.
