KORONADAL CITY – Mas ginpasangkad pa sang mga otoridad ang pagpatigayon sang operasyon batok sa mga kabataan ukon mga menor de edad nga naga partisipar sa drag racing nga hugot nga ginadumilian diri sa syudad sang Koronadal.
Sa interview sang Bombo Radyo Koronadal kay PMSgt Fely Bascon, imbestigador sang Koronadal City PNP Traffic section, ginpahayag sini nga masami nga madakpan ang mga kabataan nga naga partisipar sa drag racing sa des-oras sang kagab-ehon ukon kaagahon sa diin maligwa ang dalan kag malaka ang naga agi nga mga salakyan.
Ginpahayag pa sini nga masami nga madakpan sang mga kapulisan ang mga menor de edad nga mga drivers nga naga partisipar sa nasambit nga aktibidad sa diin wala naga usar sang helmet kag kasagaran nga modified ang ila nga mga motorsiklo.
Ginpaathag man sang kapulisan nga ginahimo sang mga ini tanan agud nga malikawan ang pagkalamita sang mga menor de edad sa disgrasya nga magluntad bangud sa karera.
Ginlaygayan man sini ang tanan nga mga ginikanan nga bantayan ang mga kabataan agud nga indi ang mga ini magpartisipar sa nasambit nga peligroso nga aktibidad.
