KORONADAL CITY – Wala na sang kabuhi sang masapwan ang isa ka tuig nga bata nga babaye matapos mareport nga nadula kag nahulog sa lining sa Purok Saranay, Barangay Namnama, Koronadal City.
Ini ang ginpahayag ni Barangay Kapitan Joel Damo sang Barangay Namnama sa interview sang Bombo Radyo Koronadal.
Suno kay Kapitan Damo, wala natalupangdan sang iloy sang bata nga nadula na ini kag ulihi na lamang nagpangita sang nagreport ang isa ka BPAT nga may nakita nga tsinelas sa kilid sang lining kag ginapatihan nahulog ini didto pasado alas-4 sang hapon, Miyerkules.
Masobra lima ka oras man nga nagpangita ang mga ini kaupod ang rescuers nagikan sa Bureau of Fire Protection (BFP) kag didto nasapwan anng bata sa Purok Rosal sang nasambit nga barangay pasado alas-9 na sa gab-i, nga apat ka block ang kalayuon sa panimalay sang biktima.
Gilayon nga gindala sa hospital ang bata sakay sa ambulansya apang gindeklarar na ini nga dead on arrival.
Kaangot sini, nagpanawagan naman si Kapitan Damo sa mga ginikanan nga indi pagpabay-an ang ila kabataan, samtang ginaawhag man sini ang mga residente nga nagaistar sa kilid sang lining ukon irigasyon nga kudalan agud malikawan nga may mahulog indi lamang bilang proteksiyon sa mga kabataan kundi mangin sa mga dalagko man.
