Nagpanawagan ang Department of Foreign Affairs (DFA) sa China nga siguruhon ang kaayuhan kag mga kinamatarong sang sobra 100 ka Pilipino nga gin-arestar bangud ginaalegar nga ilegal ang ila pagtrabaho ukon pagtinit sa amo nga pungsod.
Ginkumpirma sang DFA ang malapad nga pag-arestar matapos ginpahayag sang Chinese Foreign Ministry nga nagpatuman sila sang aksyon batok sa sobra 100 ka Pilipino nga ginapanubo nga ilegal nga nagatrabaho sa China.
Ginkilala sang DFA ang kinamatarong sang China nga ipatuman ang ila immigration laws, kun nasunod ang nagakaigo nga proseso.
Ginpangabay man sang ahensya sa mga awtoridad sang China nga proteheran ang kahimtangan sang mga Pilipino nga detained kag ipahibalo gilayon sa Philippine Foreign Service Posts ang ila pagkadakop.
Ginpahayag sang DFA nga ini suno sa Vienna Convention on Consular Relations kag sa 2013 Philippines-China Consular Agreement.
Samtang, nakig-angot na ang DFA sa Philippine Embassy sa Beijing kag mga Philippine Consulate-General sa China agud mahibaluan ang eksakto nga numero sang mga Pilipino nga gin-arestar kag ang mga rason sang ila pagkadakop.
Ginaimbestigaran man sang ahensya kun nasunod ang legal kag consular procedures sa pag-arestar sa mga Pilipino.
Ginpakamalaot naman ni Defense Secretary Gilbert Teodoro ang pag-arestar sang China sa mga Pilipino kag ginhingalan ini nga isa ka porma sang “blackmail,” samtang ginakondena niya ang ginaalegar nga paggamit sa mga Pilipino para mangin instrumento sa pagpanginlabot sa pagpatuman sang mga kasuguan sang Pilipinas.
