Indi dapat tugutan nga ang kahadlok sa Ghost Month amo ang magdikta sa importante nga mga desisyon sa kabuhi, suno sa feng shui expert nga si Master Hanz Cua.
Sa interview sang Bombo Radyo kay Master Hanz, iya ginpahayag nga ang Ghost Month isa ka cultural belief kag tradisyon sang iban nga Chinese, Taoists kag Buddhists, kag indi ini scientific nga kamatuoran.
Bangud sa pagtuo sa mataas nga yin energy, may mga tawo nga nagalikaw sa pagpakasal, pagbukas sang negosyo, pagbalhin sang balay ukon trabaho kag pagpirma sang dagku nga kontrata sa amo nga tion.
Apang ginpahayag ni Cua nga indi kinahanglan nga untaton ang mga plano kun ini importante kag kinahanglan na himuon.
Sa baylo, mahimo gamiton ang sini nga tion sa pag-ampo, pagdumdom sa mga pinalangga nga nagtaliwan kag pagplano sang mas maayo para sa palaabuton.
Ginpahanumdom man niya nga ang mga tradisyon kasubong sang paghalad sang pagkaon, insenso kag kandila nagaserbi bilang paagi sang paghinumdom sa mga nagtaliwan.
Nagbilin sang mensahe si Cua nga indi dapat bug-os nga isalig sa feng shui sa pag-atubang sang kabuhi.
Suno sa iya, mas dako gihapon ang papel sang pagpaninguha, pagpanikasog kag determinasyon sa pagkab-ot sang mga handum.
