Kinumpirma ng hostile witness na si dating OVP Special Disbursing Officer (SDO) Gina Acosta sa Senate Impeachment Court na si Vice President Sara Duterte ang nag-utos sa kanya na i-release ang P125 milyon na confidential funds kay Col. Raymund Dante Lachica.
Sa kanyang testimonya sa ika-16 na araw ng impeachment trial, sinabi ni Acosta na agad niyang tinawagan si Lachica matapos niyang ma-encash ang tseke ng confidential funds.
Ayon kay Acosta, ibinigay niya ang pera kay Lachica dahil ito ang utos ni Duterte bilang Head of Agency at dahil si Lachica umano ang nangangasiwa sa confidential operations ng OVP.
Nilinaw naman ni Acosta na hindi tungkulin ni Lachica bilang security officer na gastusin ang pondong kanyang dini-disburse bilang SDO. Gayunman, kailangan umano nitong magsumite ng utilization report matapos gamitin ang pondo para sa confidential activities.
Samantala, inatasan ni Trial Presiding Officer Francis “Chiz” Escudero si Acosta na muling humarap sa impeachment court bukas, Agosto 18, sa ilalim ng parehong subpoena.
