Nag-umpisa na sang adlaw sang Martes, Agosto 11 ang pagpanagtag sang 10 kilos nga bugas sa mga benepisyaryo sang “Bawat Bayan Makikinabang” Program sang lokal nga gobyerno sang syudad sang Koronadal. Una nga ginpatigayon ang distribution sa Barangay Morales, sa diin ginabanta 891 ka mga benepisyaryo ang natalana nga makabaton sang rice assistance.
Suno kay Mayor Erlinda Araquil, porsyon sang kabug-usan nga ₱10 million nga pondo ang ginpain para sa 27 ka mga barangay sang syudad. Ang kadamuon sang mga benepisyaryo nagalain-lain depende sa lokasyon, depende sa kadakuon sang barangay kag sa populasyon sini. Indi lamang sa Barangay Morales ang pagahatagan sang rice assistance; pagahiwaton man ang pagpanagtag sa iban pa nga barangay sang Koronadal sa masunod nga mga inadlaw.
Kaangot sini, gina-engganyo sang lokal nga gobyerno ang mga pumuluyo nga bantayan ang mga opisyal nga pahibalo kag tan-awon ang schedule sang pagpanagtag sang bugas para sa ila tagsa ka barangay agud mahibaluan kon san-o sila makabaton sang ayuda. Tinutuyo sang programa nga makapanagtag sang rice assistance sa mga kwalipikado nga benepisyaryo sa bug-os nga nagkalain-lain nga barangay sang syudad.
