Puspusan ang search and rescue operations sa eastern Indonesia matapos tumama ang magnitude 7.7 nga linog sa Flores Island subong nga Sabado, Agosto 15.
Suno kay rescue official Fathur Rhaman, naglab-ot na sa 20 ang kumpirmado nga napatay halin sa apat ka banwa sa isla nga isa sa mga kilala nga tourist destinations sa Indonesia.
Lakip sa mga narekober sang rescue teams ang isa ka wala na sang kabuhi nga persona nga natabunan sang rubble sang isa ka building nga partial nga naguba malapit sa port sang Maumere.
May duha man ka persona nga una nga nailigtas halin sa mga debris, apang isa sa ila ang ginreport nga napatay. Samtang, anum ang ginreport nga nasamaran kag duha pa ang ginapatihan nga yara sa idalom sang mga guho sa Manggarai regency.
Nagekeo regency naman ang isa sa pinakagrabe nga naapektuhan bangud ini ang yara pinakamalapit sa epicenter nga nahamtang sa north coast sang Flores Island.
Sa subong, nakatutok ang rescue teams sa pagpangita sa mga persona nga posible pa nga buhi kag natrap sa idalom sang mga guho. Apang nangin mabudlay ang operasyon bangud sa mga landslide nga nagtabon kag nagputol sa pila ka dalan, nga nagapalangin sa pag-abot sang rescue personnel kag kagamitan sa mga apektado nga lugar.
Samtang, dose-dosena nga aftershocks ang ginrekord matapos ang main quake, nga ang pinakakusog naglab-ot sa magnitude 6.1. Ginalantaw sang mga otoridad nga mahimo pa ini magresulta sa dugang nga pagguho sang mga estruktura kag landslide sa mga lugar nga naapektuhan.
Padayon man ang assessment sang mga otoridad sa kabug-usan nga extent sang halit nga ginbilin sang linog, lakip ang kahimtangan sang mga building, dalan kag iban pa nga imprastraktura.
Ang Indonesia isa sa mga pungsod nga masami makasinati sang mabaskog nga mga linog bangud nahamtang ini sa Pacific Ring of Fire, isa ka lugar nga may mataas nga seismic activity kag aktibo nga mga fault kag bulkan.
