Ginalauman sang Marbel 8 Elementary School nga mapalapad ang ila waste paper project bilang posible nga livelihood initiative sa palaabuton, bukod sa paghimo sang paper charcoal.
Sa interview sang Bombo Radyo Koronadal kay Vincent Lumanta, Project Development Officer 1, iya ginpahayag nga may dako nga posibilidad nga mangin mapuslanon ang proyekto kun makakuha sang suporta halin sa mga organisasyon ukon ahensya.
Suno kay Lumanta, mahimo man maproseso ang nakolekta nga waste paper bilang boards ukon bulletin boards, nga makadugang sa gamit sang proyekto.
Gintutukan sang buluthuan ang aktibo nga partisipasyon sang mga estudyante paagi sa kampanya nga “Basura mo, sagot mo, apon mo,” nga nagapalig-on sang husto nga waste segregation kag pagkolekta sang recyclable materials.
Padayon man ang pag-edukar sang mga estudyante agud mapabilin ang husto nga segregation kag maayo nga kalidad sang mga nakolekta nga papel.
Bisan indi bag-o ang teknolohiya sang paper charcoal, ginakabig ini sang Marbel 8 Elementary School nga paagi agod mapakita nga ang basura mahimo pa nga mangin mapuslanon nga produkto kag alternatibo nga source sang enerhiya.
