KORONADAL CITY – Naaresto sang kapulisan ang isa ka 46-anyos nga lalaki matapos makuhaan sang indi lisenyado nga armas sa PNP Checkpoint sa CPAC 4, Brgy Romualdez, President Quirino, Sultan Kudarat.
Ginkilala ang nadakpan nga si alyas “Jenny”, may-asawa, kag residente sang San Rafael Tacurong City.
Suno sa President Qurino Municipal Police Station, nabalabagan ang ginamaneho nga motorsiklo sang suspek sa ila nga ginpatigayon nga checkpoint operation kun diin nakuha sang mga otoridad ang naga-sukbit nga armas sa hawak sini.
Sang ginpangitaan sang dokumento wala ini sang may napakita sa kapulisan gani gin-aresto ini.
Nakuha sa suspek ang isa ka unit sang Cal. 45 pistol nga may kaupod nga magazine kag apat ka bala.
Sa karon, nagapabilin sa lock up cell sang President Quirino MPS samtang ginapreparar ang nagakaigo nga kaso batuk sa suspek.
