Ginakabig nga pinakadako nga proyekto sang solar-powered pump irrigation sa pungsod sa idalom sang liderato ni Pangulo Ferdinand Marcos Jr. ang pagpatukod sini sa Cabaruan, Quirino, Isabela.
Ginhimo ini nga inisyatibo sang National Irrigation Administration sang 2023 kag natapos sang Pebrero 2024 kun diin ginpondohan ini sang P65.77 milyones sa idalom sang Magat River Integrated Irrigation System.
Ginpahayag ni Pangulong Marcos nga ini nga proyekto isa ka solusyon sa daku nga gasto sang mga mangunguma agud mapatubigan ang ila mga uma gamit ang libre nga paggamit sang solar technology.
Sa idalom sang proyekto nga ini, ginalauman nga mapatubigan ang 350 ektarya nga mga uma kag makabenipisyo diri ang 237 ka mga pamilya sang mga mangunguma.
Ginpahayag pa ni Pangulo Marcos Jr. nga ini nga proyekto amo ang isa ka paagi agud pabaskugon ang sektor sang agrikultura sa pungsod.
