Kasubong nga ginapa-konsensiya sang pila ka mga mamalidha ang mga senador nga pasangkaron ang paghangop sa ginaduso nga pag-aprubar sang diborsyo sa pungsod.
Ini kadungan sang madamo nga mga pagpamatok matapos nga napasar ang absolute divorce bill sa Kamara kag padulong na sa pagsumiter sini sa Senado.
Suno kay House Committee on Women and Gender Equality chairperson kag Bataan 1st District Representative Geraldine Roman nga indi pag-guba sa pamilya ang ila ginaduso kundi paghatag sang ikaduha nga tsansa nga makaangkon sang matuod nga kahilwayan ang isa ka babaye nga naka-eksperiensiya sang wasak nga relasyon.
Paathag pa sang kongresista nga antes pa man isarado sang mga senador nga nagapamatok sa hagna ang ila isip dapat suno pa nga isipon man nila ang kabudlay sang isa ka nanay ukon babaye nga yara sa isa ka toxic relationship.
Indi suno pa manami nga ipilit ang hagna para sa mga pamilya nga kumpleto kag malipayon kundi didto sa wasak na kag indi na kaya pa nga resolbaron.
Madumduman nga yara na sa ‘technical tie’ ang numero sang mga senador nga nagapasugot kag nagapamatok sa isyu sang diborsyo rason nga nagalaum ang mga nagaduso sini nga magbag-o pa ang isip sang iban nga Senador nga nagapamatok diri.
