KORONADAL CITY – Luwas na ang dose (12) ka mga pasahero sang isa ka unit sang Yellow Bus Line ukon YBL nga may body number 1928 nga nadisgrasya sa bahin sang Barangay Balutakay, Hagonoy, Davao del Sur.
Ini ang ginpasiguro ni Mr. Bernard Bolanio, ang operations manager sang YBL sa interview sang Bombo Radyo Koronadal.
Suno kay Bolanio, halin sa General Santos City padulong sa siyudad sang Davao ang bus sang nadisgrasya.
Madanlog suno pa ang dalan bangud sa pagbubo sang ulan nga amo ang nakit-an nga rason nga gintunaan sang pagbaliskad sang bus.
Gilayon naman nga gindala sa balay-bululngan ang mga pasahero kag lunsay mga minor injuries lamang ang naangkon sang mga ini.
Ginpasiguro man ni Bolanio nga ang kumbuyuhan ang nagbayad sang pagpahospital sa mga napilasan.
Luwas man ang driver kag konduktor sang nasambit nga bus.
Sa karon, ginapasalig ni Bolanio sa mga pasahero nga indi na masulit pa ang disgrasya bangud may nagamonitor sa mga driver sang YBL.
Kadungan sini, nagpahanumdum ini nga mag-untat sa mga alagyan nga accident-prone areas kag sundon ang speed limit kon may yara.
Ginpasiguro man niya ang seguridad sang mga pasahero nga madulong saila pakadtuan, kag kon may aksidente, magabulig sila sa hospitalization.
