KORONADAL CITY – Nagsaka na sa halos 400 ka mga fisher-folks sa banwa sang Lake Sebu ang apektado sa nagapadayon nga fish kill ukon kamahong.
Ini ang ginpahayag ni Jose Rudy Muyco, ang Lake Warden sang Lake Sebu, South Cotabato sa interbyu sang Bombo Radyo Koronadal// Suno kay Muyco, naglapad pa sa 2,023 ka mga fish cages ang naapektuhan.
Kag sa karon, yara na sa masobra P17million average nga market value ang napagkit nga damyos ukon lugi sang mga nagapanag-iya sang fish cages.
Aminado man si Muyco nga technically dead na ang tunga sang lake gani masami na nga nagakatabo ang oxygen depletion, gani nagakapatay ang mga tilapia.
Nadugang pa sa factor sang kamahong ang pagdamo sang water hyacinth sa lake nga kun mapabay-an magatuga pa sang mas malala nga epekto sa mga isda.
Sa karon, naghatag na sang inisyal nga bulig ang LGU-Lake Sebu sa mga apektado, apang ginahulat sang mga ini ang pormal nga deklarasyon sang munisipyo sa pagpaidalom sa state of calamity sa bug-os nga banwa matapos nga nagdeklarar naman ang 3 ka barangay.
Ang mga barangay nga apektado ang ginalakipan sang Poblacion,Barangay Takunel kag Barangay Bacdulong.
Sa karon nagapadayon ang pila ka Emergency harvest sang mga Fish Cages Operators agud mha mapuslan pa ang mga nabilin nga isda.
