KORONADAL CITY – Nabalaka ang kadam-an nga mga Overseas Filipino Workers ukon OFW’s sa Kuwait sa ila nga sitwasyon kag dismayado sa mahuyang nga tikang sang gobyerno bangud sa kamatayon sang Pinay nga si Jullebee Ranara nga nakapauli na ang bangkay sa Pilipina.
Suno kay Miss Sisa, Bombo International Correspondent to Kuwait, kinahanglan nga may mabaskog nga kaugalingon kag huna-huna antes nga magaluwas sa pungsod agud nga malikawan ang pagpang-abuso sang amo.
Dugang pa sini nga indi mahapos ang mag-abroad apang isa man ini ka butang nga ginahimo sang mga Pinoy agud nga makalampuwas sa kapigaduhon ang tagsa ka mga pamilya.
Apang sa pihak sini isa man kasubo kung kaisa nga may nagakalatabo nga indi maayo sa iban nga mga Pinoy nga kung sa diin ginasakit sang ila sini nga mga amo kasubong na lamang sa isa ka pinay nga si Ranara nga nasapwan nga sunog sa isa ka disyerto.
Sa karon, nagaduha-duha ang mga OFW’s sa Kuwait nga indi ang 17-anyos nga bata snag employer sini ang may kahimuan kundi mismo ang iya nga amo.
Ini man ang rason kun ngaa luyag nila nga padalman pa sang mga otoridad ang imbestigasyon sa kaso sang Pinay.
Madumduman nga ginbawalan na sang Department of Migrant Workers (DMW) ang employer sang Overseas Filipino Worker (OFW) nga ginpatay kag ginsunog sa Kuwait, nga mag-hire sang iban pa nga Pinoy workers.
Magapanabat man ang Agency sini bangud napaslawan nga mamonitor ang sitwasyon sang biktima kag ginaduso karon sa gobyerno nga ideklarar ang total deployment ban sa Kuwait.
