KORONADAL CITY – Naglab-ot sa napulo ka mga fish cage operators ang naapektuhan sang panibag-o nga fish kill ukon kamahong sa banwa sang Lake Sebu, South Cotabato.
Ini ang ginkumpirmar ni Lake Warden Rudy Muyco sa interview sang Bombo Radyo Koronadal.
Suno kay Muyco, ang naapektuhan nga mga fish cage operators ang nagikan sa mga barangay sang Bacdulong kag Poblacion sa nasambit nga banwa.
Apat ka tonelada ang naapektuhan humalin pa sang Disyembre 13 sini nga tuig kun diin yara sa 10 tubtob 15 porsiyento ang wala mapuslan.
Bangud sa kamahong, nagpatigayon sang emergency harvest ang mga fish cages operator agud nga masalbar ang ila nga palangabuhian.
Ginpaathag man ni Muyco nga ang gintunaan sang fish kill ang manubo nga supply sang oxygen sa lake ng tuga sang pabag-o bag-o nga klima.
Para malikawan ang dugang nga problema sa fish kill nagpatigayon sang validation ang Lake Sebu LGU angot sa pagsunod sa water rental kag Fishery Code sang mga fish cage operators.
Kaangot sini, nagpanawagan man si Muyco sa mga pasaway nga fish cage operators nga kay-uhon ang ila nga problema.
Sa subong manageable na suno pa ang sitwasyon apang nagapadayon ang ila nga monitoring.
