KORONADAL CITY – Isa na ang ginbawian sang kabuhi samtang yara sa masobra 70 ka mga indibidwal ang nahospital bangud sa diarrhea outbreak sa Purok Spring, Barangay Lampari, Banga, South Cotabato.
Ini ang ginpahayag ni Dr. Ellen Quidilla, Municipal Health Officer sang Banga sa interview sang Bombo Radyo Koronadal.
Suno kay Dr. Quidilla, isa ka 75-anyos nga senior citizen ang napatay bangud sa dehydration kag kumplikasyon tuga sang diarrhea samtang naglab-ot naman sa 42 ka mga indibidwal ang gindala kaina sang kaagahon sa Socskssargen General Hospital bangud sa pagpamuhin, pagpalanuka kag pagpalanakit sang ulo.
Sa inisyal nga pagcheckyar sang MHO-Banga kag IPHO-South Cotabato gikan sa kontaminado nga tubig nga ilimnon sang mga residente sa lugar ang ginhalinan sang outbreak.
Ini ang rason nga gindumilian anay ang pagpainom sang tubig sa “source of drinking water” sang mga residente agud nga malikawan nga madugangan pa ang mga apektado.
Sa pagkamatuod may masobra 20 pa nga yara man sa ila panimalay kag wala na nadala sa hospital nga nakaeksperiensiya sang kasubong nga sintomas.
Mangin si Baragay Kapitan Rahib Mama ang nagapati nga tubig ang ginhalinan sang pagsakit sang mga residente.
Suno kay Kapitan Mama, personal siya nga nagamonitor sa sitwasyon sang mga kasimaryo sini kag pagdul-ong sa hospital.
Bangud sin inga hitabo, nagpadala ang MHO-Banga sang medical team nga amo ang nagatutok sa mga apektado nga residente.
Naghatag man sang malimpyo na nga ilimnon nga tubig ang LGU-Banga sa mga residente kag dugang nga dextrose kag bulong para sa mga pasyente.
Nahibaluan nga nagkuha na sang sample ang IPHO_South Cotabato sa mga pasyente kag ginpaidalom sa test agud nga mahibaluan ang ginhalinan sang sakit kag kun tama ang initial assessment nga isa ini ka “Cholera Outbreak” ang natabo sa nasambit nga lugar.
