KORONADAL CITY- Nagapadayon sa subong imbestigasyon sang mga katapo sang Bureau of Fire Protection Koronadal sa nagluntad nga sunog sa bahin sang Barangay New Pangasinan Elementary School pasado ala syete kagab-e.
Tigayon nga naabo ang mga kagamitan kag mga importante nga dokumento sa sulod sang 2 ka mga classrooms kag isa ka storage room sang nasambit nga buluthuan.
Suno sa mga residente nga nakakita sa nasambit nga mga panghitabo,nag-ibwal ang kalayo sa storage room sang nasambit nga eskwelahan kag naulamid ang katapad sini nga duha ka classroom.
Bangud sa kadam-an sa mga kagamitan nga ara sa sulod sang nasambit nga mga hulot, madasig naga nagkamang kag nagkarab-karab ang kalayo.
Madasig naman nga nag responde sa nasambit nga area ang mga katapo sang Bureau of Fire Protection Koronadal kag ang rescue firetruck sang KCC Mall of Marbel kag na-apula ang sunog, nagdugay naman sang pila kaminutos ang pagsabya sang bombero sang tubig antes pa nag-ugdaw ang kalayo, maayo na lamang wala sang iban nga mga naulamid nga mga puluy-an kag wala man sang mga napagkit nga nagkalapilasan.
Kasamtangan naman nga ginahibalo pa sang Bureau of Fire Protection Koronadal ang kabug-usan nga danyos sa nasambit nga insidente.
