KORONADAL CITY- Emosyunal nga ginsaysay sang himata sang tatlo ka mga biktima sang pagpamusil-patay sa banwa sang Surallah, South Cotabato ang nasaksihan sini sa natabo nga krimen. Suno kay Jecelyn Mangompaos, live-in partner sang isa sa mga biktima nga si Juan Diangco Pidoy, nakibot na lamang sila sa pagsulod sang mga armado sa ila panimalay.
Nagainom suno pa ang bana sini, iya manak kag utod sang hinali nagsulod ang isa ka grupo sang mga armado nga kalalakihan nga nakasukso sang itom nga uniporme kag naka-bonnet.
Nagpakilala pa nga mga katapu sang PDEA ang mga suspek kag wala sang kaluoy nga ginpamusil ang mga biktima.
Naghana pa nga makaguwa sa balay ang mga biktima agud magpalagyo apang ginpaulanan sang bala ang mga ini.
Matapos ang insidente gilayon nga nagbiya ang mga suspek padulong sa indi mahibaluan nga direksyon dala ang mga armas luthang nga gingamit sa krimen.
Indi pa matumod sa karon sang mga otoridad ang motibo sang krimen. Nagasinggitan naman sang hustisya ang pamilya sang mga biktima.
Samtang, gilayon nagpaguwa sang statement ang PDEA-Region 12 nga nagakundenar sa hitabo kag ginpanginwala nga tinawo nila ang may kahimuan sa krimen.
