KORONADAL CITY – Tuman kabudlay ang kabuhi sa iban nga pungsod ilabi na sang mga Overseas Filipino Workers (OFW).
Ini ang ginpakigbahin man ni Engr. Aldrin Sunico Cardenas, OFW advocate sa eksklusibo nga interview sang Bombo Radyo Koronadal.
Suno kay Cardenas, naeksperiensiyahan niya ang kabudlay sa iban nga pungsod kaupod ang mga Pinoy nga nagatrabaho didto.
Gani, nahibaluan niya gid ang mapait nga sitwasyon sang mga OFW nga nagasakripisyo kag ginaagwanta nga malayo sa pamilya.
Madamo sang mga nangin biktima sang pagpangmaltrato, pagkapreso, distressed OFW, ginbawian sang kabuhi, ginabilin sa airport kag mga biktima sang pagpang-abuso.
Bangud sa sitwasyon sang mga OFW nga kasubong sa iya, naghimo ini sang paagi humalin pa sang tuig 20-16 agud mabuligan ang mga Pinoy paagi sa pagkigkoordinar sa ila agud mapalab-ot sa gobyerno ang ila sitwasyon.
Sa sini nga paagi madamo man ini sang nabuligan nga makapauli nga luwas kag kaupod na sa subong ang ila tagsa ka pamilya.
Apang sa pihak sini tanan positibo ang mga OFWs sa pagsulod sang Marcos administration ilabi na sa pag-address sa mga problema sang mga Pinoy nga yara sa iban nga pungsod.
