Nagapadayon sa pagnubo sang produksyon sang kalamay sa Pilipinas bangud sa malain nga tyempo kag halit nga ginbilin sang mga bagyo.
Sa circular letter sang Sugar Regulatory Administration (SRA) nga ginpadala sa sugar industry groups, ginpahayag ni SRA Administrator Hermenegildo Serafica nga ang sugar production sa pungsod ang nagdangat lamang sa 1.8 million metric tons (MT) as of June 15.
Ang indi kinaandan nga pagnubo sa sugar production ang nakit-an sa Negros halin March 2022 tubtub May 2022 nga production data. Lakip sa gintumod rason amo ang nahalitan nga mga tubo sang naglaslas ang Bagyo Odette sang Disyembre 2021.
Bangud nahalitan ang dahon sang tubo, naapektuhan ang photosynthetic activity kag nabuhinan man ang tinonelada nga tubo sa amo nga mga binulan.
Sa data sang Department of Agriculture- Disaster Risk Reduction and Management Operations Center, nakasaad nga P1.15 billion ang halit nga ginbilin sang Bagyo Odette sa mga tubo kasubong sang 8.6 percent sang total agricultural damage.
Lakip man sa gintumod nga rason amo ang pag-ulan ulan nga nakaapekto sa maturity condition sang late milling canes.
Matandaan nga may kaangtanan sa gin-forecast na nga pagnubo sang sugar production sa Pilipinas, nagpatuman ang SRA sang sugar importation program para sa 200,000 metric tons sang refined sugar.
Kaangot sini, padayunon sang SRA ang pag-monitor sa sugar supply kag demand situation sa Pilipinas agud nga ma-manage ang sitwasyon.
