KORONADAL CITY – Naglab-ot sa halos 200 na ka mga baboy ang ginkumpiskar kag ginpaidalom sa “culling” ukon ginlubong gikan sa duha ka mga Sitio sa Barangay Naci, Surallah, South Cotabato.
Suno kay Kagawad Vevincio Esteves, ini matapos nga nagpositibo sa African Swine Fever ukon ASF ang baboy sang isa ka hog raiser sa nasambit nga Barangay.
Gani ang mga nakasulod sa 500 meter-radius gikan sa lugar kun diin nakumpirma ang kaso sang ASF ang apektado.
Suno pa sa opisyal, nakibot na lamang sila sang ginpahibalo sang Municipal Agriculture Office sa sitwasyon kag gin-athag ang pagpatigayon sang pagpangkumpiskar sa mga apektado ng baboy.
Bangud sini, indi lamang ang Brgy. Naci ang yara sa high risk of infection kundi ang mga kaiping nga kabaranggayan sini.
Dugang pa sini, mas ginpasangkad na sa karon sang ila nga talatapan ang surveillance kag monitoring sa mga restriksyon nga ginapatuman sa South Cotabato sa interprovice kag intraprovince travels sang mga baboy o kun karne sang babaoy nga ginadeliver sa ila nga banwa.
Kun madumduman, una na nga nakasulod sa kilometer radius of monitoring ang banwa sang Banga South Cotabato kun sa diin halos 200 ka mga baboy ang na igo sang ASF.
Madamo naman ang nanugon nga mga hog raisers apisar nga ginlista na sila sang Department of Agriculture agud nga mahatagan sang P4,000 nga ayuda sa mga nagasagod sang fattening; P5,000 sa mga nayon kag P2,000 naman sa mga idik bangud indi sa gihapon ini makabayad sa ila nagasto sa mga sapat.
