KORONADAL CITY- Positibo ang LGU-Koronadal nga malab-ot ang ginakabig nga “herd immunity” sa paabuton nga Pebrero tuig 2022.
Ini ang ginkumpirmar ni Koronadal City Mayor Eliordo U Ogena sa eksklusibo nga interview sang Bombo Radyo Koronadal.
Suno kay Ogena, malapit na lamang nga malab-ot sang siyudad ang ideal nga numero sang nabakunahan bangud sa madasig nga roll-out sang pagbakuna.
Dugang pa sini, yara na sa 114,720 ka indibidwal ukon 59% sang kabug-usan nga 195,821 nga populasyon sang Koronadal ang nabakunahan na kun sa diin 71,694 nga indibidwal ukon 37% ang partially vaccinated individuals kag 22% naman ukon 43,026 ang fully vaccinated individuals.
Paagi sa ini nga mga numero sa bulan pa lang sang Disyembre 2021, makita nga indi malayo kag indi imposible ang paglab-ot sa “herd immunity” sa tion nga makuha na ang target nga mabakunahan nga 135,297 ka mga pumuluyo.
