KORONADAL CITY – Nagapadayon sa subong ang imbestigasyon sang mga otoridad sa nagluntad nga pagpangluthang sang nag-wild nga pulis sa isa ka Apartment sa Barangay Zone 3, Koronadal City nga nagresulta sa pagkapatay sang isa kag pagkapilas naman sang 2 ka iban pa.
Sa eksklusibo nga interbyu sang Bombo Radyo Koronadal kay Police Lt. Col. Joedy Lito Guisinga, hepe sang Koronadal City Police Station, service firearm nga M16 assault rifle mismo sang pulis nga si Pat. Roland Lopez, 29, nga residente sang Brgy.Topland Koronadal City kag naka-assign sa South Cotabato 1st PMFC ang gingamit sini sa pagpangluthang.
Ginkilala naman ang napatay nga si Chaci Canlas, yara sa legal nga edad, graduating student kag residente sang Isulan Sultan Kudarat samtang ang mga pilason nga kaupdanan sini amo sanday Joana Saptula, karelasyon sang suspek kag residente man sang Isulan Sultan Kudarat kag isa pa ka Debie John Franco, 21 anyos nga taga-Purok Garcia, Brgy. Rotonda sa nasambit nga siyudad.
Sa panaysayon naman sang testigo nga si Manang Tata, hinablos sang tag-iya sang apartment, mainit suno pa ang argumento sang magkarelasyon nga sanday Lopez kag Saptula kagab-i pa lamang rason nga ginpa-blotter sang mga biktima ang suspek.
APang alas-2 kaina sang kaagahon sang nagbalik ang suspek dala sang iya nga service firearm, ginbuka sini ang bintana sang apartelle kun diin nagatulog ang mga biktima kag ginpaulanan sang bala.
Dead on the spot si Canlas samtang madasig naman nga gindala sa hospital ang iya nga mga kaupdanan.
Gilayon man nga ginkondenar sang PRO-12 sa pagpanguna ni PBGen. Alexander Tagum ang pagpangluthang kag gilayon nagpaguwa sang reward money na P100K sa sin-u-man nga makatudlo sa suspek.
Hustisya naman ang ginasinggitan sang pamilya sang mga biktima.
