KORONADAL CITY – Wala nagapati si South Cotabato 2nd District Representative and Deputy Speaker for Mindanao Ferdinand Hernandez nga magmadinalag-on ang ginaplano suno pa nga kudeta sang mga kaupdanan sini sa Kamara batok kay Speaker Alan Peter Cayetano angot sa isyu sang indi patas nga pagtunga sang pondo sa kada distrito nga nasakupan sang mga kongresista.
Sa interbyu sang Bombo Radyo kay Rep. Hernandez, ginpahayag sini nga indi malikawan nga may kontrobersiya ang kada pondo bangud sa ginatawag nga power of the purse.
Para sa iya, kontento na siya sa kung pila ang pondo nga igapain para sa pagpadayon sang mga proyekto sa probinsya sang South Cotabato.
Samtang ginsegundahan man sini ang nangin pahayag ni Deputy Speaker for Finance Lray Villafuerte nga ginatutokan nila anay sa subong ang pagpasar sang 2021 national budget sa baylo ang pagbag-o sang liderato sa Kamara.
