Nagpabutyag sang pagkatingala si Presidente Ferdinand “Bongbong” Marcos Jr. sa mga protesta batok sa Pax Silica nga inisyatibo sang Estados Unidos, bangod suno sa iya, wala pa sing pormal nga kasugtanan ukon dokumento nga napirmahan ang Pilipinas nahanungod sa sini.
Sa press conference matapos ang ika-33 nga APEC Economic Leaders Meeting sa Shenzhen, China, ginpaathag ni Marcos nga wala nagalakip sang pagtukod sang data centers sa Pilipinas ang nasambit nga inisyatibo, kundi nagasentro lamang sa pagpauswag sang teknolohiya kag artificial intelligence ukon AI.
Suno sa Presidente, isa ini ka kahigayunan para sa Pilipinas nga mangin kabahin sa pagpauswag sang pangkalibutanon nga industriya sang AI, sa baylo nga mangin nagagamit lamang sang mga produkto sini.
Gindugang niya nga kinahanglan maggahin sang tion, panikasog kag pondo ang pungsod agud indi mapabay-an ang mga kahigayunan nga igahatag sang nagabag-o nga pangkalibutanon nga ekonomiya.
Gin-agda man niya ang publiko nga tan-awon ang mahimo nga kaayuhan sang inisyatibo sa ekonomiya sang Pilipinas kag sang iban nga pungsod.
Samtang, nagpatigayon sang mga protesta ang linibo ka tawo sa nagkalain-lain nga bahin sang kalibutan batok sa Pax Silica, bangod sa mga kabalaka nahanungod sa mahimo sini nga epekto sa palibot kag sa paggamit sang mga kinaugali-an nga manggad.
Nagdugang pa ang mga protesta sa tion sang ika-49 nga ASEAN Summit kag pagbisita ni United States President Donald Trump sa Pilipinas.













