KORONADAL CITY – Hugot nga igaimplementar sang Highway Patrol Group sa probinsya sang South Cotabato ang No Barrier No Angkas policy subong nga adlaw, Agosto 3.
Ini ang ginhatagan punto ni HPG-South Cotabato head PMaj. Roel Villarin kun sa diin Lauman sang mga pumuluyo sa bug-os nga probinsya sang South Cotabato ang mas ginpahugtan pa nga mga pagbantay kag pagtutok sa mga motorista kaangot sa ginapatuman nga polisa.
Dugang ni Maj. Villarin, kinahanglan nga tumanon ini sang katawhan, labi na sang may yara sang angkas, bangud may nagakaigo nga mga penalidad para sa sin-oman nga magalapas diri.
Suno sa opisyal, mangin kasubong sa kaso nga reckless driving ang igasang-at nga reklamo batok sa sin-oman nga magalapas diri, ukon mahimo pa nga mapreso.
Samtang magapakipag angot man ang ahensya sa talatapan sang Land Transportation Office kag kay South Cotabato Police Provincial Director Col. Jemuel Siason agud pahugtan pa ang pagpatuman sini bangud ang nasambit nga kamanduan ang nagikan sa DILG.
Aminado man ini nga wala natuman sang mga pumuluyo ang No Barrier No Angkas policy bug-os nga probinsya sang South Cotabato, apesar ginpatuman na ini sadtong Agosto 1.
Ini suno pa ang nanotisyaran sang nasambit nga opisyal kadungan sang ila pag-obserbar nga wala ginatuman sang mga may angkas ang nasambit nga polisa.
Suno kay Maj. Villarin posible nga wala ini natuman bangud sa kakulangon sa pagpalab-ot sang impormasyon sa ila angot diri.
