KORONADAL CITY – Tuman ang pagpaningkamot subong sang mga barangay officials sang Brgy. Assumption sa siyudad sang Koronadal makaligad gindamyosan sang halos asud-asod nga mga kalamidad kag balatian.
Sa interbyu sang Bombo Radyo Koronadal kay Brgy. Assumption kapitan Sagin Monday, problema nila sa subong ang pagpanalasa sang landslide, pagbaha, mangin ang hailstorm nga may kadakuon sang ice cube sang nakaligad nga mga adlaw.
Magluwas diri, ginhalitan man sila sang buhawi ku sa diin pila ka mga propedad ang ginpalid sang mabaskog nga hangin.
Dugang ni Kapitan Monday, isa man sa ila ginahatagan sang atensyon amo ang anom nga mga kabataan nga nakabatyag sang pagpalanakit sang tiyan kag pagpamuhin sa evacuation center halin sa 60 pamilya.
Sa subong temporaryo nga sirado sa gihapon ang mga dalan kag tourism sites samtang padayon man ang damage assessment sa damyos sang nasambit nga mga kalamidad.
