KORONADAL CITY – May yara na sang persons of interest nga ginalantaw ang Sto. Nino PNP kasunod sang pagkapatay sang alkalde sang Sto Nino nga si Mayor Matinong takna alas 8 kahapon sang aga sa bahin sang Purok Libertad, Barangay Poblacion.
Sa eksklusibo nga interbyu sang Bombo Radyo Koronadal kay Police Captain Ian Bagot, hepe sang Sto Niño Municipal Police Station, base sa panaysayon sang mga testigo, duha ka mga lalaki nga nakasakay sa duag itom nga may pula nga XRM nga motorsiklo ang nagluthang sa nasambit nga opisyal.
Lima nga bala ang nag-igo sa alkalde kun sa diin igo sa ulo ang nangin rason sang hinali nga pagkamatay sini.
Gilayon naman nga nagpalagyo ang mga suspek makaligad nga ginhimo ang krimen.
Hugot naman nga ginkondenar sang PNP ang nagluntad nga pagluthang kay Mayor Matinong.
Sa subong, personal grudge, pulitika kag ginaaligar nga pagkaulamid sini sa listahan sang mga narcopolitician ang mga motibo nga ginalantaw sa pagpatay sa opisyal.
Madumdoman nga nalakip ang pangalan sang alkalde sa mga ginpangalanan ni Pangulong Duterte nga suno pa naulamid sa illegal nga droga.
Hugot naman nga ginpanginwala sang alkalde nga naulamid siya sa droga kag ginatinlo ang iya pangalan.
Ang nasambit nga opisyal ang yara sa ikaduha nga termino pa lamang nga alkalde sang nasambit nga banwa.
Nahibaloan nga antes pa man ang insidente, nakabaton na suno pa sang death threat ang alkalde.
Sa subong naka-half mast man ang hayahay sang Sto Nino PNP angot sa natabo.
