KORONADAL CITY – Ginpasiguro sang Police Regional Office-12 nga pagatutokan kag pagaimbestigaran ang nagluntad nga pagpamahog sang isa ka operatiba sang Regional Police Drug Enforcement Unit (RPDEU) sa reporter sang Bombo Radyo samtang nagapatigayon sang coverage sa ginpatigayon nga drug buybust operation sa Brgy. Carpenter Hill, Koronadal City.
Sa interbyu sang Bombo Radyo Koronadal kay PNP-12 spokesman PLt. Col. Lino Capellan, luyag man sini nga maimbestigaran sang talatapan sang kapulisan ang matood nga natabo kag naglab-ot sa punto nga ginpahog si Bombo Bryan Belotindos nga ilakip suno pa ini sa drug watchlist makaligad nakuha sa Facebook live ang nawong sini nga wala naka-facemask kag nagapanigarilyo.
Suno kay Capellan, posible nga nakaangkon lamang sang dyutay nga indi paghangpanay sa natabo labi na nga lain man ang ginpahayag sang talatapan sang RPDEU.
Personal man ini nga nagpangayo sang dispensa para sa ila operatiba kun mapamatud-an nga may nahambal ini nga indi maayo kay Bombo Bryan, kag ila suno pa ini nga ipatawag agud maka-eksplikar ngaa ginhimo sini ang nasambit nga pagpamahog.
Ginpasiguro man sini nga naglab-ot na ini sa ihibalo ni Regional Director PBGen. Michael John Dubria kag ginpahayag nga ginatutokan na sini ang nasambit nga isyu.
Sa ulihi, nagalaum ang opisyal nga kuntani makay-o na ang nasambit nga kagarot, labi na nga nagaserbe nga partners ang media kag pulis sa mga operasyon nga ginahimo sang ulihi.
