KORONADAL CITY – Yara na subong sa kustodiya sang kapulisan ang suspek sa bahin sang Prk. Magsaysay, Brgy Rotunda nga ginkapatay sang isa ka persona.
Ginkilala ang nasambit nga suspek nga si Edgardo Españona, 64 anyos kag residente sang nasambit nga lugar.
Base sa imbestigasyon, nakaangkon sang mainit nga baisanay si Españona kag ang biktima nga hinablos man sini nga si Jonray Sumugod bangud suno pa sa nadula nga manok sini.
Hinali naman nga ginbuno ni Españona si Sumugod sa iya tiyan apang ginliso-liso pa sini ang patalom.
Gilayon nga gindangat sa ospital si Jonray apang tigayon ini nga ginbawian sang kabuhi.
Suno kay Brgy Rotunda kapitan Jerry Marmonejo, tigayon nga nagsungka sa iya ang suspek makaligad ang insidente kag gintugyan sa kapulisan.
Desidido naman ang pamilya sang biktima nga pasakaan sang kaso nga murder si Españona, nga tuman naman ang iya paghinulsol sa natabo.
Nahibaloan nga yara sa impluwensiya sang makahulubog nga ilimnon ang suspek sang nagluntad ang krimen.
Wala ginalauman sang pamilya Sumugod nga tigayon nga bun-on ni Edgardo Españona ang iya kaugalingon nga hinablos nga si Junrey Sumugod tubtob sa mapatay ini.
Suno sa iloy sang biktima nga si Rosalinda Doromal, isa man suno pa ka maayo nga tawo si Edgardo apang wala niya lamang sini ginapatihan kag ginalauman nga mahimo nga bun-on sang nasambit nga tiyo ang iya kaugalingon nga hinablos bangud lamang sa alegasyon nga nadula ang manok sang ulihi.
Hustisya subong ang iya panawagan agud manabat si Españona sa iya ginhimo nga krimen.
Suno naman sa utod sini nga si Joel, kumpiyansa suno pa nila nga mabaydan ang anuman nga damyos sa tion nga mapatay nila si Sumugod, labi na nga may maragtas na ini nga nakapiyansa sang nakapatay suno pa ini sadto.
Nahibaloan nga nangin testigo sa nasambit nga krimen ang 14 anyos nga bata ni Junrey kag tubtob sa subong indi pa makaistorya sang maayo bangud sa trauma.
Nabilin ni Junrey ang iya asawa kag 4 ka mga kabataan.
