KORONADAL CITY – Tigayon na nga gin-umpisahan sang pamunoan sang Yellow Bus Line ang pag-operate sang ila main terminal nga nahamtang sa Gensan Drive Koronadal City.
Ini ang gin-anunsyar ni YBL Operations Manager Boy Par sa interbyu sang Bombo Radyo Koronadal.
Suno kay Par, balasehan sang sini nga tikang ang ginpaguwa nga court order nga nagapabor sa ila nga magbalik sa ila operasyon sa ila kaugalingon nga terminal kun sa diin final na suno pa ini kag executory.
Apang ginpaathag sini nga maga-pass by ukon magaagi sa gihapon ang ila mga bus unit sa integrated terminal agud ma-akomodar ang ila mga pasahero didto.
Sa pihak sang sini nga kamandoan, nagpanindugan si Koronadal City Mayor Eliordo Ogena nga wala pa sang business permit ang Yellow Bus Line Inc. sa ila nga liwat nga pag-operate sa ila kaugalingon nga terminal sa Gensan Drive, Koronadal City.
Suno sa alkalde, wala pa naka-apply ang mga ini sang nasambit nga lisensiya.
Bangud sini, madamo nga mga pasahero nga nagahulat sa Koronadal City Integrated Public Terminal ang nakibot kag naugot kaangot sa pagbalik sang mga unit sang Yellow Bus Line Inc. sa ila daan nga terminal sa baylo nga magpondo kasubong sang kinaandan sa pampubliko nga terminal.
Suno kay alyas Alfie, isa sa mga pasahero, isa ka oras na sila nga naghulat agud makapauli pakadto sa Kidapawan City, kag wala ini nakahibalo na nagsaylo naman ang YBL sa ila kaugalingon nga terminal.
Tuman suno pa ka-hassle ang natabo ilabi na nga nag-apply sila sa NAPOLCOM kag indi gilayon makapauli bangud wala sila sang may masakyan.
Ginkakibot man mangin sang iban nga mga asosasyon sang public transport ang ginhimo nga tikang sang Yellow Bus Line nga mag-operate sa ila terminal.
Suno kay Edgardo Taborete, miyembro sang UVTS Association, wala nila ginalauman ang nasambit nga tikang sang YBL.
Nagalaum sila nga magbalik ang nasambit nga mga bus units sang nasambit nga kumbyohan nga mag-operate gihapon sa integrated public terminal bangud kun magapadayon ang ini nga tikang sang YBL, ginahuna-hunaan na nila nga magbalik sa guwa agud makabawi sa ila nga negosyo kag makaakomodar sang mga pasahero, apang gin-ako sini nga mabudlay lamang bangud pagapangitaan pa nila ini sang legal nga aksyon.
