Nagbilin sang madalom nga kasubo sa football community sa Spain ang wala ginapaabot nga pagtaliwan sang CD Tenerife striker nga si Jesus de Miguel, 30 anyos, matapos siya maangkon sang cardiac arrest bangud sang mabaskog nga banggaan sa tunga sang hampang kontra FC Andorra.
Nagluntad ang insidente sang nagbanggaanay si De Miguel kag ang goalkeeper nga si Jesus Owono, nga nagguwa sa penalty area agud salubungon ang bola.
Sa ila pagbungguanay, natandog sang tuhod sang goalkeeper ang dughan sang striker, nga gilayon nga natumba kag nadulaan sang malay sa tunga mismo sang hampang.
Gilayon nga nagresponde ang medical team kag ginhatagan siya sang pauna nga pagbulig sa sulod sang playing field antes siya gindala sa ospital agud mahatagan sang dugang nga pag-atipan.
Apang, bisan pa sa gilayon nga pagresponde sang medical personnel, wala na naluwas si De Miguel. Ginkumpirmar sang iya club nga CD Tenerife ang iya pagtaliwan sang Martes.
Bangud sa makasulubo nga insidente, nagdesisyon ang Spanish Football Federation nga ipaiway ang tanan nga mga hampang nga nakatalana nga hiwaton sa amo nga adlaw.
Nagpaabot naman sang pagpangasubo ang nagkalain-lain nga miyembro sang football community, lakip ang mga players, opisyal kag supporters, samtang nagapabutyag sang suporta sa pamilya kag mga hinigugma sang nagtaliwan nga atleta.
