Nagdugang sang kapin 20 ka bus sa nagkalain-lain nga ruta ang Yellow Bus Line Inc. agud maserbisyuhan ang dugang nga mga pasahero sa palaabuton nga pagsaulog sang Undas.
Ginkumpirmar ini ni Bernard Bolanio, Consultant to Operations sang kompanya, sa interview sang Bombo Radyo Koronadal, kag ginpahayag nga handa ang ila talatapan nga mag-atipan sa pagdamo sang mga pasahero nga nagapauli sa ila tagsa ka lugar.
Suno kay Bolanio, wala sang pagbag-o sa ila regular nga iskedyul sang pagbyahe. Ang mga bus halin Koronadal pakadto General Santos City kag Davao magaumpisa alas 4:30 sang aga, samtang alas 5:00 naman ang biyahe pakadto Tacurong kag Surallah.
Para sa last trip, alas 9:00 sang gab-i ang Koronadal-General Santos City, samtang alas 8:30 ang pakadto Tacurong kag Surallah. Apang, posible nga i-adjust tubtob alas 9:00 sang gab-i ang katapusan nga biyahe pakadto Surallah sa tion sang Undas.
Dugang ni Bolanio, handa man ang kompanya nga magdugang sang biyahe ukon mag-adjust sang oras kon magdamo pa ang mga pasahero sa mga terminal agud masiguro nga makapauli ang tanan sa ila destinasyon.
