Gintalakay ni prosecution spokesperson Robert Ace Barbers ang mga negosyo ni Vice President Sara Duterte kag kon bala nagpabilin siya nga may interes ukon kabahin sa pagdumala sang mga ini samtang nagapungko sa puwesto.
Suno kay Barbers, gin-usisa sang prosecution ang mga dokumento nga mismo ginpasa ni Duterte sa gobyerno, lakip ang iya Statement of Assets, Liabilities and Net Worth (SALN), General Information Sheet (GIS) sang mga kompanya kag Income Tax Returns (ITR).
Base sa SALN, nadeklara ang mga business interest nanday Duterte kag sang iya bana nga si Manases Carpio sa bug-os nga tion sang iya termino bilang bise presidente. Ginpahayag man ni Barbers nga nagdugang pa ang mga ini samtang yara siya sa puwesto.
Ginpaathag ni Barbers nga ginadumilian sang Konstitusyon ang presidente kag bise presidente sa pagdumala sang ila mga negosyo kag sa pag-angkon sang pinansyal nga interes sa mga kontrata sang gobyerno samtang nagaserbisyo sa puwesto.
