Nagapadayon ang imbestigasyon sang mga otoridad sa nagluntad nga engkwentro sa tunga sang Philippine Marines kag mga myembro sang Lawless group sa Barangay Tagudtungan, Bongo Island, Parang, Maguindanao Del Norte.
Ini matapos nga naglab-ot sa pito ang ginbawian sang kabuhi matapos nga makaengkwentro sang kasuldaduhan ang grupo nanday Kapitan Tamano Argasi, Commander Paradise kag Commander Macmod.
Suno sa PRO BAR, nagpatigayon sang Maritime Security Patrol (MarSecPat) ang mga katapo sang Marine Battalion Landing Team 2 kag 65th Force Reconnaissance Company sa koordinasyon sang PNP PRO BAR sa lugar matapos makabaton sang report angot sa nasiplatan nga mga armado.
Sakay sa SURC (Small Unit Riverine Craft) ang Philippine Marines sang nag-abot sa bahin sang Barangay Tagudtungan, Bongo Island sa banwa sang Parang sang hinali lang nga ginpalupok sang mga armado nga kalalakihan nga ginapatihan man nga katapo sang grupo nga ginapangunahan ni Commander Paradise ang mga ini.
Suno sa otoridad, nagbalos man sang lupok ang mga mga Marines nga nagresulta sang makapila ka bes nga pagbayluhanay sang lupok.
Ang nasambit nga mga armado nga kalalakihan ang nagasakay sa dose ka motorized boats sang naka-engkwentro ang mga ini sa mga otoridad.
Suno sa AFP, pito ang ginreport nga napatay, tatlo diri ang narecover samtang ang apat nga nabilin nga bangkay ginpatihan nga naglugdang sa dagat.
Narekober man sang militar ang nagkalain-lain nga mga armas kag nagastos nga mga bala gikan sa mga armado nga kalalakihan.
Samtang, ginkumpirmar ni PRO-BAR Regional Director PBGEN Romeo Macapaz, nga may apat nga narekober kag padayon nga ginahibalo ang ila identity.
Samtang pilason naman ang isa ka katapo sang Philippine Marines nga nagapaayo na subong sa balay-bululngan.
Sa karon, padayon gihapon ang imbestigasyon kag pag pangita sang mga nakapalagyo nga mga kaupdanan sang mga biktima.
