Inanunsyo ni Jonvic Remulla na opisyal nang naglabas ang Interpol ng Red Notice laban kina Gerald Bantag at Rafael Dumlao III kaugnay ng mga kasong kinahaharap ng mga ito.
Bukod sa dalawa, nabanggit din ang pangalan ng negosyanteng si Atong Ang, habang hinihintay pa umano ng Interpol ang pinal na pag-apruba sa hiwalay na Red Notice request laban kay Zaldy Co.
Ayon kay Remulla, kumpleto na ang documentary requirements para kay Co ngunit dumaraan pa ito sa masusing pagsusuri ng international police organization bago tuluyang aprubahan.
Nilinaw naman ng kalihim na ang Red Notice ay hindi agad nangangahulugan ng warrant of arrest. Isa itong pandaigdigang alerto upang hanapin at pansamantalang pigilan ang isang indibidwal habang isinasagawa ang extradition o iba pang legal na proseso.
Si Bantag ay nahaharap sa mabibigat na alegasyon kaugnay ng pagpaslang sa broadcaster na Percy Lapid, partikular sa pagkamatay ng middleman sa kaso. Samantala, si Dumlao ay dati nang nahatulan sa high-profile kidnapping at pagpatay sa South Korean businessman na Jee Ick Joo noong 2016—bagama’t mariin pa rin nilang itinatanggi ang mga akusasyon laban sa kanila.
Nagpahayag naman ng pagkadismaya si Remulla sa umano’y mabagal na pagtugis sa mga wanted personalities at inatasan ang kapulisan na paigtingin pa ang operasyon upang agad silang madakip.
“Hindi dapat tumagal nang ganito ang paghahanap,” diin ng kalihim.
