KORONADAL CITY – Nakapagkit ang probinsiya sang South Cotabato sang pinakabata nga kaso sang Human Immunodeficiency Virus ukon HIV.
Ini ang gin-admiter sang Integrated Provincial Health Office (IPHO) matapos magpositibo ang isa ka 7-anyos nga bata nga lalaki.
Suno kay John Arlo M. Codilla, RN, MMHeA, head sang Disease Prevention and Control Unit, indi inborn ukon mother-to-child transmission ang kaso sang nasambit nga bata.
Base sa ila inisyal nga pagchekyar, dako ang posibilidad nga sexual transmission ang rason sang pag-angkon sang HIV sang bata.
Sa karon, ginpadalman pa ang imbestigasyon bangud ginapatihan nga may pagpang-abuso nga natabo sa bata.
Kaangot sini, liwat nga nagpahanumdom ang IPHO sa publiko nga maghalong, magpalantaw kag magpa-test kon kinahanglan, kag gilayon nga magpangayo sang bulig kag magpakonsulta agud malikawan nga makaangkon sang HIV kag nangin carrier sini nga balatian.
Samtang, yara sa 142 ang bag-o nga kaso sang HIV nga napagkit sa ginpatigayon nga screening alin Enero tubtob Setyembre 2025.
Ang mga bag-o nga kaso ang napagkit sa siyudad sang Koronadal kag mga banwa sang Polomolok, Tupi, Tampakan, Surallah, Banga, Lake Sebu, T’boli, kag pila pa ka mga indibidwal nga indi matumod ang puluy-an.
Sa kabug-usan, naglab-ot na sa 1,278 HIV cases ang South Cotabato nga ginakabig pinakamataas sa bug-os nga Rehiyon XII.
