KORONADAL CITY – Naglab-ot sa lima ka mga Sitio sa banwa sang Bagumbayan, Sultan Kudarat ang apektado sang landslide matapos ang halos duha ka adlaw nga sunod-sunod nga pagbuho sang ulan.
Ini ang ginpahayag ni Kagawad Hern Aries Galve sang Barangay Masiag, Bagumbayan, Sultan Kudarat sa interview sang Bombo Radyo Koronadal.
Ang mga apektado nga Sitio ang ginalakipan sang Sitio Kawayan, Sitio Blakol, Sitio Falls kag Sitio Kipuso.
Yara sa masobra napulo ka mga pamilya man ang nagbakwit matapos nga naguba ang ila mga panimalay tuga sang dalagko nga mga tension cracks dulot sang amat-amat nga pagka-usmod sang duta.
Gilayon man nga nagpatigayon sang assessment ang Barangay Disaster Risk Reduction and Management Council kaupod ang Municipal Disaster Risk Reduction Management Council kag ginrekomendar nga e-relocate sa mas luwas nga lugar ang mga pamilya nga nagaistar sa nasambit nga mga Sitio nga apektado sang landslide.
Magluwas sini, indi man maagyan ang Sitio Kipuso pasaka sa iban pa nga mga Sitio bangud sa pagkatiphag sang duta sa dalan.
Sa karon, nagapanawagan ang opisyal sa mga pumuluyo sa ila nga lugar nga mangin alerto labi na kag ginalauman sa gihapon ang pagbuhos sang ulan.
Nahibaluan nga ang nasambit nga barangay sa banwa sang Bagumbayan ang yara sa nabukid nga bahin sang Sultan Kudarat.
