Naguba ang tatlo tubtob apat ka mga balay sa Sitio Tukolaw, Brgy. Lamlahak sa Banwa sang Lake Sebu, South Cotabato, bangud sang padayon nga mabaskog nga pag-ulan kag pagbaha nga tuga sang wala untat nga pagbunok sang ulan.
Sa interview sang Bombo Radyo Koronadal, ginpahayag ni Lake Sebu Mayor Antonio “Kent” Fungan Jr. nga halos 48 oras na nga nagapadayon ang mabaskog nga ulan sa banwa, nga nagresulta man sa pagbaha sa pila ka mga lugar.
Suno sa alkalde, Brgy. Lamlahak ang isa sa mga pinakaapektado nga barangay.
Gindugang pa ni Fungan nga ginsulod sang tubig-baha ang pila ka mga kabalayan sa Brgy. Lamlahak, Brgy. Tra’ankini, kag Brgy. Seloton.
Dugang pa ni Fungan, bisan may mga balay nga naguba, wala pa sang mga residente nga nag-evacuate bangud ginpili sang kadam-an nga magpabilin anay sa mga balay sang ila mga himata.
Samtang, padayon man ang monitoring sang mga rescuers, volunteers, kag lokal nga panguluhan sa mga apektado nga lugar agud masiguro ang kaluwasan sang mga residente kag makahatag sang gilayon nga bulig kun maglala ang sitwasyon.
Bangud sini, ginpasiguro man sang alkalde nga nakapreparar na ang LGU sang Lake Sebu sa paghatag sang relief assistance kag iban pa nga suporta sa mga pamilya nga naapektuhan sang padayon nga pag-ulan kag pagbaha.
