KORONADAL CITY – Yara na sa kustodiya sang mga otoridad ang tatlo ka indibidwal matapos nga madakpan bangud sa pag-entra sa drag racing ukon karera sang motorskilo sa siyudad sang Koronadal.
Ini ang ginkumpirmar ni PMSgt. Fely Bascon, traffic investigator sang Koronadal City PNP sa interview sang Bombo Radyo Koronadal.
Suno kay Bascon, nadakpan ang mga ini pasado ala una sang kaagahon sa atubangan sang City hall ground sang nagaronda ang kapulisan kag nakit-an ang mga open pipe nga motorsiklo nga nagaparking sa lugar.
Agud nga indi makapalagyo ang mga ini, ginpatay sang kapulisan ang blinker sang ila nga patrol car kag ginpalapitan bangod may mga spotter ang mga ini kung may pulis sa palibot.
Suno pa kay Bascon isa sa mga nadakpan ang nagapang-edaron lamang sang 16-anyos kag isa naman 18 anyos nga may upod pa nga 5-anyos nga bata sini.
Dugang pa ni Bascon, nagrason sa ila ang isa sa mga nadakpan nga malantaw lamang kuntani sang dragrace apang wala ini ginpatihan bangud ang dala niya nga motorsiklo open pipe, modified tire kag wala ini sang suga.
Dismayado man si Bascon bangud nakapalagyo ang iban nga kaupdanan sang mga nadakpan nga lunsay mga taga-Tampakan, South Cotabato.
Nahibaluan nga may mga babaye man nga naga-entra sa dragrace sakay sang ila nga raider nga nakit-an sang nagaronda nga kapulisan.
Kaangot sini, nagpanawagan naman ang mga otoridad sa mga ginikanan nga sawayon ang mga kabataan ilabi na ang mga nagalagaw kun gab-i tubtob kaagahon kag naga-entra sa karera sang motorsiklo.
