Ginaduso sa Senado ang Senate Bill No. 2330 ukon eBayad Act nga ginpanukala ni Sen. Christopher “Bong” Go, nga nagatinguha himuon nga nagapanguna nga pamaagi ang digital payment sa mga transaksyon sang gobyerno agud mapadasig ang pagbayad sang mga baraydan kag pag-release sang pondo sa publiko.
Sa idalom sang hagna, obligahon ang mga ahensya sang gobyerno, government-owned and controlled corporations (GOCCs), local government units (LGUs), state universities and colleges (SUCs), kag iban pa nga sakop sang layi nga magbaton kag maggamit sang interoperable digital payment systems sa pagkolekta kag pagpagwa sang pondo.
Sakop sang digital disbursement ang pagbayad sang sweldo, allowances, honoraria, cash assistance kag iban pa nga benepisyo, samtang kinahanglan man nga may digital payment options sa pagbayad sang buhis, permits, fees, tolls kag iban pa nga koleksyon sang gobyerno.
Nagalakip man ang hagna sang electronic official receipts ukon digital proof of payment agud mapalig-on ang transparency kag mapadasig ang pag-audit sang paggamit sang pondo publiko.
Nagahatag man ang hagna sang mga insentibo sa mga LGU agud awhagon ang dyutay nga negosyo, kasubong sang tyangge, market vendors, food stall owners kag tricycle drivers, nga mag-usar sang digital payment systems.
Ginalauman nga may tubtob tatlo ka tuig ang mga ahensya sang gobyerno sa bug-os nga pagpatuman sini, samtang ang mga malapason mahimo mapatawan sang multa nga P200,000 tubtob P2 milyon, pagkapriso nga duha tubtob napulo ka tuig, ukon kasubong nga silot.
