Ginpahayag ni Senador Francis “Kiko” Pangilinan nga ang AI-generated video sang state-owned China Daily nga nagalaragway sa mga Pilipino bilang mga amu indi lang racist kag gahikay, sa baylo kabahin man sang propaganda sang Beijing agud paluyahon ang bili sang 2016 Arbitral Award nga nagpasanyog sa Pilipinas sa isyu sang West Philippine Sea.
Suno sa senador, samtang ginasaulog sang Pilipinas ang ika-10 nga anibersaryo sang arbitral ruling, ginapalapnag man sang China ang mga impormasyon nga iya ginatawag nga malain kag indi matuod agud kuwestyunon ang desisyon sang international tribunal.
Ginawhag ni Pangilinan ang Beijing nga kakason dayon ang video, mangayo sang pasaylo sa publiko, kag panabton ang mga responsable sa paghimo sini.
Ginpabug-atan man niya ang importansya sang mas mabaskog nga suporta sang international community sa arbitral ruling, kag ginpasiguro nga padayon niya nga depensahan ang katungod sang Pilipinas sa West Philippine Sea bisan pa sang mga pagpakamalaot kag travel ban nga ginpatuman sang China batok sa iya sang 2023.
