KORONADAL CITY – Yara na sa kustodiya sang mga otoridad ang tatlo ka indibidwal matapos nga ma-aresto sa checkpoint sa bahin sang Purok 1, Brgy. San Vicente, Banga, South Cotabato.
Ginkilala sang mga otoridad ang nadakpan nga kanday James Anthony Bergado Bacongga, 24-anyos, mekaniko kag residente sang Brgy. Salakit, Kiamba, Sarangani Province; Renz Ynion Magpayo, 26-anyos, estudyante nga residente sang Maria Rosa Village, Poblacion, Polomolok; kag isa ka babaye nga ginkilala kay Aira Anog Palomo, 23-anyos, dalaga, estudyante kag residente sang Cannery Site, Brgy. Poblacion, Polomolok.
Sandig sa report sang PDEA kag Banga PNP, naaresto ang tatlo ka indibidwal matapos na-intercept sa ginpatigayon nga checkpoint operation sang 2nd Maneuver platoon SCPMFC sa nasambit nga lugar.
Nakuha sa tatlo ang isa ka unit sang Toyota Wigo, 14 sachet sang ginpatihan nga shabu nga ginabulubanta may kabug-aton nga masobra 30 gramos kag may estimated street value nga P204,000 lakip na ang nagkalain-lain nga mga drug paraphernalia.
Suno sa mga otoridad, ang mga suspek ang ginakonsiderar nga High Value Individuals (HVI).
Gilayon naman nga gindala sa PDEA 12 office ang mga nadakpan kag nakumpiskar nga illegal nga droga para sa kustodiya kag nagakaigo nga disposisyon.
Magapangatubang naman sang nagakaigo nga kaso ang mga ini.
