Hindi dumalo si Sara Duterte sa ika-apat na public hearing ng House Committee on Justice kaugnay ng kanyang impeachment, ngunit nakita siyang dumalo sa pagbubukas ng EXTRA+Ordinary: The Vice Presidents of the Philippines, isang pop-up exhibit sa Laguna.
Sa Kamara, itinuloy ng mga mambabatas ang pagdinig na nakatuon sa mga alegasyon laban sa bise presidente, kabilang ang umano’y maling paggamit ng confidential funds, hindi maipaliwanag na yaman, at pagbabanta umano kina Ferdinand Marcos Jr., Liza Araneta Marcos, at Martin Romualdez.
Ipinresenta rin ng National Bureau of Investigation (NBI) ang kanilang mga natuklasan kaugnay ng mga paratang. Inaasahang magpapasya ang komite kung may “probable cause,” isang hakbang na maaaring magtulak sa pag-akyat ng kaso sa plenaryo at kalaunan ay sa Senado para sa impeachment trial.
Sa kabila ng lumalakas na panawagan sa Kamara, nanatiling absent si Duterte sa pagdinig. Ayon sa kanyang kampo, ang mga reklamo ay “recycled accusations” at kulang sa matibay na batayan.
Samantala, iginiit ng kanyang asawa na si Manases Carpio na may posibleng paglabag sa Bank Secrecy Law, Data Privacy Act, at Anti-Money Laundering Act ang pagsisiwalat ng kanilang bank records sa mga naunang pagdinig.
Sa kabilang banda, ang pagdalo ni Duterte sa exhibit ay ipinakita bilang pagpapatuloy ng kanyang opisyal na tungkulin at public engagements, sa kabila ng umiigting na proseso ng impeachment.
Tampok sa naturang exhibit ang kasaysayan at papel ng mga naging bise presidente ng bansa—isang simbolikong backdrop na, para sa ilan, ay nagpapakita ng kanyang paninindigan na ipagpatuloy ang kanyang mandato sa gitna ng mga kontrobersiya.
