Luwas nga narescue sa siyudad sang Van sa Turkey ang 11 ka mga Overseas Filipino Workers halin sa Iran sa tunga sang nagapadayon nga tensyon sa Middle East, suno sa Department of Foreign Affairs.
Ginpatigayon ang evacuation paagi sa koordinasyon sang embahada sang Pilipinas sa Tehran kag Ankara, kag ginapaabot nga makabalik sila sa Pilipinas sa madason nga mga adlaw.
Ginpasiguro man sang DFA nga padayon ang pagbulig sa ginabulubanta 800 ka mga Pilipino nga nagaestar sa Iran nga luyag magpauli sa pungsod.
Samtang, ginpahanumdom sang DFA ang mga Pilipino nga nagakinahanglan bulig nga magkontak gilayon sa embahada paagi sa ila hotline kag social media.
Base sa datos sang gobyerno, may kabug-usan nga 1,979 ka Pilipino sa siyam ka pungsod sa Middle East nga luyag na marepatriate pinakadamo halin sa Kuwait nga may 633 ka OFWs.
Apang, nagapadayon ang pagsarado sang airspace sa pila ka bahin sang rehiyon bangud sa nagaluntad nga giyera.
